काठमाडौं, ३ फागुन ।
हृदयेश त्रिपाठी अध्यक्ष रहेको जनता प्रगतिशील पार्टी निर्वाचन आयोगमा औपचारिक रुपमा दर्ता भएको छ ।
३ फागुनमा गरेको आयोगको निर्णय अनुसार जनता प्रगतिशील पार्टी दर्ता भएको हो ।
दल दर्ताको प्रमाणपत्र अध्यक्ष हृदयेश त्रिपाठीले मंगलबार बुझेका छन् । आयोगमा पार्टीको दर्ता नम्बर १७९ रहेको छ ।
पार्टीको केन्द्रिय कार्यालय काठमाडौं महानगरपालिका-१० मा राखिएको छ ।
स्वतन्त्र राजनीतिक समूह खाेलेका त्रिपाठीलाइ दलले घाेषित गरेकाे आधिकारिक उम्मेदवारकाे विरूद्धमा लागेकाे भन्दै निर्वाचन प्रचारप्रसार चलिरहकै बेला राजपा नेपालले त्रिपाठीलाइ कारवाही गरेकाे थियाे । त्रिपाठीलाइ पांच वर्षका लागि निलम्बन गरेकाे थियाे ।
कार्वाही पश्चात दलविहिन बनेका त्रिपाठी २०७४ काे संघिय निर्वाचनमा नेकपा एमालेबाट चुनाव लडेका थिए । त्रिपाठी पश्चिम नवलपरासीकाे निर्वाचन क्षेत्र नं १ बाट निर्वाचित प्रतिनिधिसभा सदस्य हुन् ।
स्थानीय निर्वाचन घाेषणा भए लगत्तै त्रिपाठी जनता प्रगतिशिल पार्टी खाेलेका हुन् ।
यस अघि त्रिपाठीले आगामी स्थानीय निर्वाचन अगावै प्रदेश नं १, लुम्बिनी र सुदूरपश्चिम प्रदेशको सीमाङ्कन टुङ्ग्याउन माग गरेका थिए । स्थानीय तहको नामाङ्कन र सीमाङ्कन गर्ने उद्देश्यले गठित आयोगको सिफारिस मधेस प्रदेशमा मात्रै कार्यान्वयन भएको भन्दै जनता प्रगतिशील पार्टीले आगामी निर्वाचनअघि नै उक्त समितिको सिफारिसअनुसार प्रदेश नं १, लुम्बिनी र सुदूरपश्चिम प्रदेशमा पनि कार्यान्वयन गर्न माग गरेका हुन् ।
