उखु किसानको बक्यौता भुक्तानी गर्न चिनी मिल मालिक सहमत, ५ बुँदे सहमति
बृजराज कुशवाहा, नवलपरासी । उखु किसानहरूको बक्यौता भुक्तानी सम्बन्धी समस्यालाई लिएर प्रमुख जिल्ला अधिकारी (सीडीओ) को रोहबरमा भएको छलफलमा चिनी मिल सञ्चालक र किसान पक्षबीच विभिन्न ५ बुँदे सहमति भएको छ ।
राष्ट्रिय कृषि श्रमिक संघ नेपाल, नवलपरासीको आयोजनामा सम्पन्न वार्तामा संघका राष्ट्रिय महासचिव गोपाल यादव, जिल्ला अध्यक्ष निमनारायण चौधरी तथा राष्ट्रिय श्रमिक महासंघ नेपाल, नवलपरासीका अध्यक्ष चन्द्रभान कुशवाहाको उपस्थिति रहेको थियो । वार्तामा २५ जना किसान प्रतिनिधि तथा ३ वटा चिनी मिलका प्रतिनिधिहरू सहभागी भएका थिए ।
बैठकले चालु आर्थिक वर्षका साथै विगतका आर्थिक वर्षहरू २०७९/८० र २०८०/८१ को समेत बाँकी बक्यौता रकम किस्ताबन्दीमै भए पनि किसानलाई भुक्तानी गर्ने निर्णय गरेको हो । सहमतिअनुसार चालु आर्थिक वर्षको उखु बिक्रीको रकम किसानलाई किस्ताबन्दीमा भए पनि प्राथमिकताका साथ भुक्तानी गरिनेछ ।
त्यसैगरी लुम्बिनी चिनी मिलले आर्थिक वर्ष २०७९/८० मा बाँकी राखेको उखुको समर्थन मूल्य रू. २० प्रति क्विन्टलका दरले हुन आउने रकम भुक्तानी गर्ने प्रतिबद्धता जनाएको छ । त्यस्तै, आर्थिक वर्ष २०८०/८१ को रू. २५ का दरको बाँकी बक्यौतामध्ये जेठ मसान्तसम्म ५ करोड ५० लाख रुपैयाँ भुक्तानी गर्ने जनाएको छ ।
असार मसान्तसम्म चालु सत्रको थप ८ करोड रुपैयाँ भुक्तानी गर्ने प्रतिबद्धता समेत मिलले जनाएको छ । बाँकी रकमसमेत यथाशीघ्र उपलब्ध गराइने सहमति भएको छ ।
यस्तै, बागमती खाँडसारी चिनी मिलले चालु आर्थिक वर्षको सम्पूर्ण बक्यौता असार मसान्तभित्र भुक्तानी गर्ने तथा केही रकम बाँकी रहेमा साउन १५ गतेभित्र अनिवार्य रूपमा किसानलाई उपलब्ध गराउने जनाएको छ ।
बैठकमा बागमती खाँडसारी चिनी मिलको विगत आर्थिक वर्ष २०७९/८० र २०८०/८१ को बाँकी बक्यौता रहेको समर्थन मूल्यको रकम भुक्तानी सम्बन्धमा यसअघि भएको सहमतिअनुसार रकम भुक्तानी गराउन सम्बन्धित मिल मालिकसँग समन्वय गर्ने निर्णयसमेत गरिएको छ ।
तत्व फार्मसँग सम्बन्धित बक्यौताका विषयमा उक्त फार्मले जेठ १० गतेभित्र बाँकी बक्यौता, भुक्तानी प्रक्रिया तथा समयावधिसहितको विस्तृत विवरण उपलब्ध गराउने सहमति जनाएको छ ।
उखु खेती प्रवर्द्धनका लागि जिल्लाको हावापानी र माटो सुहाउँदा उन्नत जातको उखु विस्तार गर्न आवश्यक अध्ययन तथा परीक्षण गर्ने सहमति पनि बैठकले गरेको छ ।
उखु किसानहरूले लामो समयदेखि चिनी मिलहरूले समयमा भुक्तानी नगरेको भन्दै आन्दोलन गर्दै आएका छन् । पछिल्लो सहमतिपछि किसानहरूले अब व्यवहारिक कार्यान्वयनको अपेक्षा गरेका छन् ।
